O le faagaioia o pepa e talosaga ai i galuega faavaitaimi mo aumalaga e tuua Samoa mo ia galuega i Niu Sila ma Ausetalia, ua faamautū ai i se faai’uga a le Kapeneta le faaauau pea ona feagai nisi o auaunaga tuma’oti se tolu ma le ofoina o le fesoasoani e faagaioia ai pepa mo ia galuega.
O le Pacific Workforce Group Limited, Poutasi Development Trust ma le auaunaga a le afioga Taimalie Charlie Ah Liki Westerlund ua latou faaauau ona faatino lea galuega, ae e tumau lava le faaaogā o ofisa o Fono Faavae a itumalo palota e 51 e faaoo iai talosaga mo galuega faavaitaimi.
E tasi le afe tālā e totogi e le Fono Faavae a se itumalo palota i le polokalame pe afai e fia auai ma ua faamanino lea tulaga e le afioga i le tama’ita’i Sui Palemia.
Le finagalo o le Sui Palemia ma le Minisita o Tupe le afioga Mulipola Anarosa Ale-Molioo i le fono ma tusitala.
