O le alii ta’ita’i leoleo poo se police Inspector i le matāgaluega o leoleo i Niu Sila le susuga Semisi James Jimmy Patea, o se tamafanau a Samoa ua filifilia e na te ta’ita’ia le galuega a leoleo e to’alima mai Niu Sila o le a feagai ma se galuega fesoasoani i le Matāgaluega o Leoleo, Falepuipui ma le Toe Fuata’ina i Samoa.
Ua faailoa i se lipoti a le nusipepa o le Sunday Samoan o le a galulue ia leoleo mai Aotearoa i se polokalame ua faipaaga ai le malo o Niu Sila ma le malo o Samoa ae aga’i tonu i le galuega faaleoleo ma o se polokalame na afua mai i se talosaga a le tatou malo.
O le masina fou o Me ua faamoemoe e amata galulue ai le ta’ita’i leoleo o Semisi James Patea ma lana vaega e faaleleia le auaunaga faaleoleo i Samoa ma le faamoemoe o le a siitia ma ausia ai se isi laasaga maualuga i le faatinoga o lea auaunaga tāua i lo tatou atunuu.
O le ta’ita’i leoleo ia Semisi James Patea na soifua i Samoa ae na tuua le atunuu mo Niu Sila a o laitiiti, peita’i o lona filifilia ua maua ai lona avanoa e toe taliu mai e galue i lo tatou atunuu.
