O osofa’iga e faaaogā ai taavale e faaleaga ai ni nofoaga poo ram raids faapea foi ma gaoiga taavale mo tietiega, o nisi ia o mafuaaga ua ta’ua i se lipoti i le asō ua mafua ai le siitia pea o le totogi o inisiua o taavale gaoia, car theft insurance.
Ua faailoa e le AA Insurance i le Newstalk i le asō ua siitia a latou inisiua i tulaga ia i le 36.5 pasene i le atunuu atoa ae 43 pasene ua siitia ai i Aukilani i totonu o le 12 masina talu ai.
Fai mai a latou o taavale ia e aga’i tele iai ituaiga osofa’iga ia e gaoia ma faaaogā i tulaga faapea, o taavale e itiiti tau o le tulaga o loo iai, lower value ma o taavale e silia ma le ta’ilima tausaga ma e masani ona faapaka i alatele.
E lē o toe po i le silafia a le atunuu le tele o le mau faalavelave tutupu i lenei vaitau ua faaaogā ai lava taavale e faaleagaina ai ni pisinisi ma gaoia oloa, ae lē gata foi i lea o le faaaogā o taavale e faaoo ai manu’a i nisi ma faavevesi solo ai faaitu ma magaala e le au solitulafono.
Fai mai le mau a se tasi o foma’i sa gaoia foi lana taavale mai Remuera, o le taimi nei ua lē o toe pei Niu Sila o Niu Sila ona o nei tulaga ua tula’i mai. E ta’ua i le lipoti na faasiilima lea foma’i ae gaoia lana taavale.
