Ua silasila nei le Minisita o Faato’aga ma Faigafaiva ia toe fausia le nofoaga i le itumalo o Palauli Numera Tasi, sa maua ai poloka ‘aisa ma pepa ‘aisa mo le atina’e o faigafaiva i totonu o lea itumalo faapalota. Sa iai le nofoaga faapea i totonu o le itumalo lea sa i le afioaga o Sala’ilua i tausaga ua tuanai ae na lē toe maua lea auaunaga ona o se feteena’iga faalotoifale.
O le tāua o lea nofoaga ona sa maua ai le fesoasoani mo poloka ‘aisa e faaaogā e ‘alia fagota mo i’a e maua i o latou faiva i ogasami loloto. Na faailoa le toe silasila o le minisita ma le matagaluega i lea tulaga i le talomua a le itumalo o Palauli Numera Tasi sa faatino i le faai’uga o le vaiaso na te’a nei. O se faamoemoe na auai nuu ma afioaga e ono o loo i totonu o le itumalo ma sa tumutumu ai lea vaega o Puleono i Salafai i le Aso Tofi ma le Aso Faraile ua mavae.
Ni vaega o saunoaga mai le tamaitai faipule o Palauli Numera Tasi le Minisita o Tupe le afioga Mulipola Anarosa Ale Molioo ma le Minisita o Faato’aga ma Faigafaiva le susuga Laauli Leuatea Polataivao Fosi Schmidt, i le faamoemoe o Palauli Numera Tasi.
