O se ulugalii matutua e silia ma le ta’i 90 tausaga o le soifua lea ua faamaonia mai o i laua ia na maua atu ua maliliu i totonu o le nofoaga e tausia ai le ‘au matutua, retirement village i Adelaide i le aso ananafi e pei ona lipotia atu foi e talafou.
O le mae’a o su’esu’ega sa faia i le aso ananafi ua faamatuu mai ai loa se faamatalaga o le mataupu lea ma o loo masalomia o se faalavelave ua faaoo ai le oti e le tamā i lona to’alua ma toe faamuta ai ma lona ia lava soifua i totonu o lea nofoaga.
O le te’a laititi o le 8 i le taeao ananafi na valaau ane ai leoleo i le mataupu lea ina ua maua atu e se tasi o le aufaigaluega le ulugalii ua maiiliu. Fai mai na mua’i oo atu i lea nofoaga ma aumau ai i le 7 tausaga talu ai ma o molimau a nisi o o la tuaoi e aumau faatasi ai i lea nofoaga e faapea o le tina sa le’i atoa lona malosi pe ua atoa nei le tolu masina ae o le tamā sa matele lava ina faanoanoa ma mafatia.
O loo faia pea su’esu’ega ma ua logoina foi o la aiga.
