Ua moomia le agai o le pulega a le Waka Kotahi e faaleleia saogalemu i luga o auala a Waikato.
O le talosaga lea a le Waikato Chamber of Commerce i le mae’a sau o le tala faanoanoa i le afiafi ananafi, ua maliu le ave taavale o le ambulance lea na fetoai ma le isi taavale i le vaveao ananafi, ma maliu ai lava le toatasi, ma o ia lea o le isi avetaavale.
Tusa ma le 11 itula lea na suia ai auala mo taavale na uia lea vaega o le State Highway 1 i Saute o Cambridge, ma i molimau a aiga nonofo latalata ane i lea nofoaga, e le fou le tutupu o faalavelave i lea vaega o le auala.
I le lipoti a le Newshub o loo taua ai e Anita Hawkins, na ia faalogoina loa le pa’ō leotele e tusa lea o le ‘afa o le tolu o le vaveao ananafi, na ia iloaina lelei lava le mea ua tupu.
Ae mai le Waka Kotahi, o lea o loo agai e faaleleia itu tau saogalemu, peitai mai le pule sili o le Waikato Chamber of Commerce, o tala lava ia ua leva ona faalogo iai i le tele o tausaga.
