O se tala faavauvau ua ufitia ai le Fono a Ekalesia Soofaatasi i Samoa i le tuumalo ai o le afioga i le Tiakono o le Ekalesia Katoliko sa avea ma ta’ita’ifono o le Fono a Ekalesia Soofaatasi mo le sefulu tausaga, le afioga Kasiano Leaupepe o se tasi o poutu toa o le fono a ekalesia Kerisiano i le atunuu.
O le Aso Lulu e pei ona faailoa i faasalalauga i luga o fesoota’iga faaonapo nei le api o foliga na faamānavaina ai galuega i le ola nei a le afioga i le Tiakono i le 86 o tausaga o lona soifua. O le tausaga nei na faamavae ai o ia ma le tofiga ta’ita’ifono o le fono a ekalesia soofaatasi ina ua gasegase.
Na suitulaga o ia i le susuga i le faifeau Oka Fauolo ua maliu sa avea ma ta’ita’ifono, ma o le taimi nei ua tauaveina lea tofiga e le susuga i le Faifeau mālōlō manumalo o le ekalesia Metotisi le susuga Aisoli Iuli, ae sui ta’ita’ifono le susuga i le faifeau Asotasi Gu Time o le Ekalesia Faapotopotoga Kerisiano Samoa.
