O le aulia mai o le vaiaso mulimuli o lenei masina o Iulai ua molimauina ai i le lipoti lata mai a le soifua mālōlōina le toe aga’i i luga o le numera o tagata i lo tatou atunuu ua maua i le vairusi o le faama’i Koviti-19.
O faamaumauga a le matagaluega mo aso e lua mai le aso 19 i le aso 21 o Iulai e 75 gasegase fou, ma le to’alua o loo taofia i nofoaga faapitoa i le maota gasegase o Tupua Tamasese Meaole i Motootua.
O lea aofa’iga o tagata mai le lautele o le atunuu ae leai ni tagata malaga mai fafo. O le 75 lea o gasegase fou ua oo atu ai le aofa’iga atoa o tagata e aofia ai pasese ma le lautele o le atunuu ua aafia i le faama’i i le 15,318.
O loo avanoa pea maota gasegase i Tuasivi ma Motootua faapea falema’i faaitumalo mo le faia o tuipuipui o ē e lei faia lava, faapea i latou ua fia maua le tui faaopoopo ona pau lea o le puipuiga sili mo tagata uma. E leai se soifua na faamauina i le lua aso e pei ona iai le lipoti lata mai na aafia soifua i le faama’i ma faatumau ai pea i le 29 tagata ua maliliu ona o āuga o le Koviti-19.
