E toatolu Malu o le Malo o ni leoleo sinia ua filifilia e avea ma avefua a Samoa e ala i le Matagaluega o Leoleo, Falepuipui ma le Ola Toe Fuataina, i le auai i se aoaoga i le Kolisi o Leoleo i le atunuu o Peretania tele, mo le umi e tasi le masina.
O lea aoaoga o le a autu i mataupu tau i le taitaiga poo le leadership i totonu o galuega faaleoleo, ma o i latou ua filifilia ua aofia ai le tamaitai leoleo o loo umia le tulaga o le Komesina lagolago susuga Papalii Efo Moalele, ma alii leoleo asiasi poo inspectors, le afioga Muliagatele Tavete Tusani, ma Lafi Matautia.
O le Hai Komesina o Peretania i Samoa, David Ward, na ia ave le faamalo i Malu o le Malo ua tusiaao iai le Komesina ma le matagaluega e auai i lea aoaoga faavaomalo, o le a sailiili ai i ni auala e faaleleia ma siitia ai le tulaga faataitai i le faatinoga o tiute ma galuega faaleoleo.
O le faanaunautaiga o le sui o le Malo Peretania i Samoa, ia maua se faalumaga lelei ma taua e i latou nei mai le aoaoga e lava taoso ai i le lumanai pe a tulai mai o ni taitai e tauaveina le galuega a Malu o le Malo i Samoa.
