O le Aso Gafua asau o le a tulai ai i le Faamasinoga se alii 51 tausaga le matua e tali i moliaga a leoleo o le umia o laau faasāina ma le umia o le pauta faasāina o le ‘aisa poo le methamphetamine.
O lea tagata na pu’eina ma taofia e leoleo i se latou osofaiga i le Aso Tofi na te’a nei lea e lē gata na maua ai laau faasāina le ‘aisa ae na maua ai foi ma ni masini computers ma se tinoitupe e sefulu afe tala. Ua faaopoopo lea gaioiga solitulafono i nisi foi osofaiga a leoleo i le faai’uga o le tausaga ua mavae ma le amataga o le tausaga nei na maua ai foi tupe, o maruana ma le ‘aisa faapea masini computers ma telefoni feaveai i nofoaga sa agai iai osofaiga.
O le tasi o ia mataupu o loo molia ai ni tagata faigaluega o le ofisa o le komisi o faigapalota lea ua faatulaga mai e le faamasinoga o le aso 27 o le masina nei o Iuni e su’esu’eina ai moliaga o i laua o loo molia ai.
