Ua ta’i lua vaiaso ma alu malaga a le va’a o le Lady Naomi i Tutuila ina ua tatala malaga masani ile tuanai o puipuiga sa faamalosia ona o le faama’i. Ua lipotia ai le manaomia o le faaopoopo o le numela o pasese e malaga ona o le taimi nei e na’o e nao le 60 le pasese o loo mafai ona ave e ui e maualuga atu se numela o tagata e mafai ona malaga.
O le maualuga o pasese e totogi mo vaalele laiti o loo tautuaina malaga ile va o Samoa e lua, ae o loo tele le faamama avega i le totogi o pasese i luga o le Lady Naomi, ua faaalia ise lipoti a le Talanei i Amerika Samoa e le mafai ona toe foi le Lady Naomi i ana malaga masani i vaiaso taitasi, seia vagana ua mafai ona toe maua le aofaiga masani o ana pasese e tauave ina ia faamalieina ai tulaga tau tupe maua ile faaaogaina o le va’a o le Malo o Samoa.
E le’o iloa poo fea o loo mafua mai ai le tapulaa o le numela o pasese e tauave e le va’a, ae talu ona tai lua vaiaso ma malaga le Lady Naomi, ua molimauina ile malaga ile faaiuga o le vaiaso ua mavae atu nei, le taunuu o le vaa i le taeao o le aso Toonai poo le te’a o le iva, ma amata siaki pasese ma uta, lea e te’a le lima ile afiafi lata ile ono o galulue le au vaa, o tagata ofisa o le tiute, le ofisa o le fa’asu le quarantine ma le pulega o uafu, ile tau kiliaina o uta a pasese faapea le anoano o faamomoli.
O le itu faigata, o tagata o le pasese mai Savaii faapea faamomoli mo aiga i Salafai ona e iai i latou sa tofafa i le uafu i Mulifanua, na faatoa malaga ile aso Sa ona o le tuai maua o a latou uta ma faamomoli. O loo iai le fesili tele na faasoa mai ai nisi oi latou, poo afea e maua ai se laveai i lea tulaga.
