O le taunuu i le Malo o se finagalo tetee o nisi o matai o le afioaga o Fagalii i le toe tatala o le malaevaalele o loo tu i se vaega o le nuu, ona o atugaluga i le saogalemu o tagata o alala tu lata iai, ua faailoa e le Minisita o Galuega tetele ma pulega o malaevaalele ua iai se fuafuaga e feiloai atu ia i latou o loo tetee, i le silasila a le Malo e tausi le va nonofo i le tu ma le aganuu, ae e le taofia ai le toe tatala o le malaevaalele i le masina fou o Oketopa.
O le tamalii sa avea ma faipule o le itumalo o le Vaimauga i Sasae le afioga Tuisugaletaua Sofara Aveau sa avea ma minisita o le kapeneta i ni faigamalo ua mavae, faatasi ai ma nisi o matai o le afioaga, ua ave se latou tusi tetee i lea fuafuaga a le malo.
O le polokalame o le Soalepule i le TV2 i le po o le Aso Lulu na faailoa ai e le Minisita le tofa Olo Afoa Fiti Vaai, ua mae’a ona toe faia sailiiliga ma ua faatumau pea le saogalemu o le toe tatalaina o Fagalii mo malaga a vaalele laiti.
Ua faailoa foi e le Minisita le tofa Olo Afoa Fiti Vaai i lea faatalanoaga, o tausaga ua tuanai a o faaaoga le malaevaalele i Fagalii sa lelei tupe na maua ai e le Samoa Airways.
Ua ia faailoa ai foi o ni atugaluga ua faailoa i le iai o nisi ua gasegase ona o le pa’ō o leo o vaalele, e leai se faamaoniga e tusa o faamaumauga a le soifua maloloina.
