Ua molimauina le pa’u teisi ifo o tagata ua maua i āuga o le korona vairusi poo le faama’i Koviti-19 e pei ona faailoa e le matagaluega o le soifua mālōlōina i lana lipoti lata mai o le fā aso na amata faamauina i le aso 21 o Iulai e oo mai i le aso 24 le Aso Sa na te’a nei.
E 56 gasegase na faamauina ai i totonu o lea piliota ma ua aofia ai ma tagata malaga mai fafo e to’alua, o lona uiga o le to’a 54 o i latou mai le lautele o le tatou atunuu. Ua oo atu ai nei le aofa’iga atoa o ē ua aafia i le faama’i i Samoa i le 15,374.
E to’alima gasegase o loo taofia i nofoaga faapitoa i le maota gasegase o Tupua Tamasese Meaole i Motootua, ma le to’atasi o loo taofia i potu mo gasegase tigaina le High Dependency Unit poo le HDU. Ua fagufagu mai ma taulogologo mai ai pea le soifua mālōlōina i le atunuu e tautuana puipuiga o le faama’i e tausisia i taimi uma, aemaise o lenei taimi ua aveesea aiaiga o vavao ma ua faamuta foi le toe iai o Samoa i taimi o faalavelave faafuase’i.
E leai se soifua na fano i le faama’i i le taimi na tuufaatasia ai le lipoti lata mai o le faama’i i lo tatou atunuu ma ua tumau ai pea le aofa’iga e 29 o ē ua maliliu e mafua i le Koviti-19.
