Ua iai le popolega o le ono tapunia o falemai mo le maloloina o le mafaufau ona o le lē lava o le aufaigaluega.
O se tala ua sau ai i le mae’a salalau o le ripoti e ono tapunia faitotoa o le falemai a Hillmorton i Kalaiesetete ona e na o le ‘afa o le aufaigaluega o loo iai.
O faamaoniga mai le pulega a le Te Whatu Ora ua mautinoa ai foi le tulaga le mautonu o iai auaunaga i le falemai.
Saunoa ai le sui o le itu agai a le National, Matt Doocey, ua lagona le popole ona e le o iai se fuafuaga a le malo e tali mai ai.
Tuuaia e Doocey o lea e pisi le minisita o le soifua maloloina e toe faatulaga le matagaluega ae tuu le aufaigaluega e tatau ona ave iai le faamuamua.
I faamaumauga e pei ona faailoa e le leitio a Niu Sila faamauina i le faaiuga o Iuni o le tausaga nei, e silia ma le 640 avanoa faigaluega i totonu o le mental health sector ma o le faafitauli tele o iai nei o le utiuti o le aufaigaluega.
