O le uta o fualaau ma vailaau mo se tasi o faletalavai i Samoa na faia iai se faai’uga a le kamupani vaalele a le Ea Niu Sila e aveese le uta o le oka a lea faletalavai mai le malaga na alu i Samoa. 

Na ta’utino le kamupani vaalele a le Ea Niu Sila na toe tuu ese le uta lea e iai le oka mo le faletalavai ona ua lē lava le avanoa i le vaega e tuu ai uta a le vaa, ma sa ave ai le faamuamua i uta a tagata sa malaga ai i lea faigamalaga. 

Ta’ua e Maria Westerlund Hunter i le Samoa Observer poo ai lava na faia lea faai’uga e tatau ona iloa o faletalavai o se vaega foi lea o le Soifua Maloloina o Samoa ma e matuā lē talafeagai tele lea faai’uga na fai. 

Faailoa e le Ea Niu Sila e laiti numera o malaga i Samoa i le taimi nei peitai e fai si to’atele o le numera o tagata malaga ma e mana’omia le avanoa mo ato ma uta a le pasese na ala ai ona faaititia le avanoa mo isi uta poo cargo. 

Na faaoo atu le manatu o Maria i le malo o Samoa faapea ai ma le kamupani vaalele a le Ea Niu Sila ina ia faamuamua tulaga o vailaau ma fualaau ona e mana’omia e tagata mo gasegase. 

Talitonu le Ea Niu Sila o le tatala ai o alavaa o Samoa i le lalolagi atoa i le masina o Aokuso o le a faaopoopo ai malaga ma o le a telē ai le avanoa mo uta ma faamomoli i le atunuu.