E tolu komiti faatonu o nisi o auaunaga a le malo ua lipotia le faamaonia e le kapeneta, o tofiga ta’ita’i fono. O le faletua le afioga Tauiliili Alise Faulalo Stunnenberg, sa filifilia o se sui o le komiti faatonu o le pulega o tagata tafafao mai fafo, a o lea ua siitia nei e avea ma ta’ita’ifono o lea komiti faatonu, ma ua sui tulaga i le alii pule o le faletalimalo o le Taumeasina Island Resort sa avea ma sui ta’ita’ifono. 

O le komiti faatonu o le faalapotopotoga o eleele a le malo le Samoa Land Corporation ua filifilia iai le alii loia le afioga Matafeo George Latu e avea ma ta’ita’ifono ma o se tasi foi o sui filifilia o le komiti faatonu. Ua sui tulaga o ia i se tasi o tamalii o le atunuu sa seei i le tofiga ta’ita’ifono mo lea komiti faatonu le tofa Lavea Tupuola Malifa. 

O le susuga Lilo Peter Punivalu o se sui o le komiti faatonu o le pulega o fela’ua’iga i luga o le laueleele poo le land transport authority, ua see atu nei e tauave le tofiga ta’ita’ifono o lea komiti faatonu. 

O lea foi ua lipotia le filifilia o nisi o sui o nisi o komiti faatonu mo nisi o auaunaga a le malo e pei o le faalapotopotoga o le faaputugatupe o le lumanai manuia o tagata le NPF, lea ua faamaonia e le kapeneta le avea o le susuga Papalii Panoa Tavita Moala e avea ma sui o le komiti faatonu, ma o se tamalii foi o le atunuu sa avea ma pule o lea faalapotopotpoga a le malo i tausaga ua tuanai. 

E iai nisi o tamalii sa tauva i le palota tele i le tausaga ua mavae sa lē faamanuiaina ae ua talia foi e le kapeneta lo latou avea ma faatonu poo directors mo nisi o auaunaga a le malo, e aofia ai le afioga Sala Vaimili II ua avea ma sui o le komiti faatonu o le pulega o uafu. 

O le tofa Fata Ryan Shuster ua avea ma sui o le komiti faatonu o le pulega o taaloga ma malae taalo, ma le filifilia o se tasi sa galue i le matagaluega o fela’ua’iga ma galuega tetele a le malo le afioga Leota Kapeneta Perelini, ua faamaonia e le kapeneta le avea ma se tasi o sui o le komiti faatonu o le pulega o fela’ua’iga i luga o le laueleele.