I le vae lona tolu o le taamilosaga lakapi taitoafitu a le kamupani telefoni o le Vodafone, lea ua mae’a ma ua sauni i le vaega lona fa, o le ‘au a le Pacific Ezy Tepatasi ua siamupini i le faaiuga o le vaega tolu sa faia i le malae o le Apia Park ma le malae taalo a le Malisi i Lotopa.
Na sue siamupini le Pacific Ezy ma le ‘au a le BBE Vaiala ma manumalo ai i ‘ai e 24 i le 21. O le tulaga 3 i le taamilosaga lenei o le ‘au o le Ott Constructors Tama Uli, tulaga 4 o le Ott Constructors Laulii Lions, o le tulaga 5 o le aulakapi taitoafitu o le Pacific Ezy Safotu ae tulaga ono ai le ‘au o le Vailima Marist Saint Josephs.
O aulakapi taitoafitu i le vaega o tamaitai ua siamupini ai le SCB Apia Maroons, tulaga lua ai le ‘au a tamaitai o le No Idea, ae o le tulaga 3 o le ‘au a tamaitai ua faaigoaina o le Striders.
