O le afio atu o le Ao Mamalu o le Malo o Samoa ma lana Masiofo faapea lana aumalaga filifilia e auai i toe sauniga o le Tupu Tamaitai o Peretania ua mafua ona o se valaaulia faapitoa i sui o Malo o le Taupulega.
Ua faailoa lea tulaga i se pepa o faamaumauga a le Malo o Samoa ma o loo taua ai, e faapea talu ai o Samoa o se tasi o sui o atunuu o Malo o le Taupulega a Peretania, ua alagatatau ai le auai atu o le Ao Mamalu o le Malo e avea ma sui o le Malo o Samoa.
O le faigamalaga e pei ona sa tuua Samoa i le po o le Aso Lua o le vaiaso nei, sa ui atu i Sini Ausetalia e maua ai le avanoa i se malaga faapitoa a se vaalele o le Malo Ausetalia poo se charter flight e malaga faatasi ai ma sui o isi atunuu.
O loo totogi e le Malo pasese uma o le Ao Mamalu o le Malo ma lana masiofo i malaga a vaalele faapisinisi mai Apia i Sini, ma le toe foi mai i Samoa.
