Ua taoto nei i luma o le faamasinoga maualuga poo le faamasinoga sili a le atunuu se mataupu ua faatō’ai ai se lu’i faaletulafono a le faletua o lē sa avea ma Faamasino Sili ua tuumalo.

O le lu’i lenei ua tuua’ia ai le Ofisa o Tausi Mavaega le Public Trust i le auala na faamautū ai le uili, poo se tapenaga faaletulafono o le vaevaeina o aseta poo meatotino a lē sa avea ma Faamasino Sili le afioga Patu Falefatu Maka Sapolu, mo tagata e to’afitu poo beneficiaries, e aofia ai ma lona to’alua faaipoipo le afioga Iliganoa Daphne Sapolu.

O se tasi o tuua’iga a lē ua talosaga mo se poloa’iga a le faamasinoga e faapea e iai gaioiga faaalatua na aafia i le tapenaga o le uili muamua ma o lana mau e lē o le vaevaega lea o meatotino o le uili o loo ia silafia a o soifua lona to’alua faaipoipo.

O pepa o faamaumauga a le faamasinoga i le talosaga o loo faailoa ai foi e lē ua talosaga, ua lē mafai e le Ofisa Tausi Mavaega ona faamalieina aiaiga o le tulafono o mavaega tausi i le uili na faamauina i le aso 25 o Setema o le tausaga e 2020 ona e lei auai uma i latou e to’afitu e agavaa i faamanuiaga o meatotino, i le aso na faailoa ai le uili.

O ia tuua’iga ma nisi o mataupu o loo aofia i le finauga a le itu talosaga o le a suesueina ma faia iai se faai’uga pe a fofogaina le mataupu i le masina o Oketopa.