Ua faamauina se gau o tupe maua a le kamupani vaalele a Ausetalia le Qantas ma e lata i le 2 piliona ma ua atoa ai foi ma le tolu tausaga sosoo o iai pea le kamupani i le tulaga lea o le lusi o tupe maua.
O loo faamatala i se pepa o faamatalaga mai le kamupani o aafiaga lava o le Delta ma le Omicron lea ua mafua ai, atoa ma le tau o le toe amataina o faigamalaga ina ua mae’a vavao ma sā o le faama’i.
Saunoa le ofisa sili Alan Joyce, a tuufaatasi tausaga e tolu ua tuanai e iloa ai o le aofa’iga atoa o tupe gau a le kamupani e 25 piliona.
Na saunoa foi Joyce o se tasi o faigata ona o le to’atele o le aufaigaluega ua apalai mo livi ma o se faafitauli tele lea aemaise o lea ua faato’ā toe amata lelei ana faigamalaga. O le masina fou e manatu le ofisa sili e tatau ona oo atu iai ua toe foi le kamupani i le tulaga lelei sa masani ai a o le’i oo mai le faama’i Koviti-19.
