Ua toe vaaia tulisi mai fafo i lo tatou atunuu aemaise i le taulaga ma e iai le talitonuga o malaga i le vaiaso mulimuli o Iulai na saofia mai ai ia tagata tafafao i le fuafuaga ua faigofie avanoa mo le toe foi, amata atu i lenei masina fou o Aokuso, ua toe tatala ai tuaoi faavaomalo o Samoa i malaga masani i le tuanai o le 3 tausaga o tapunia ona o puipuiga o le faama’i tele ua faitau miliona tagata o le lalolagi ua fano ai ola ma soifua, ae faapena foi i tagata ua aafia i le Koviti-19.
Ua faailoa e le tamaitai Ofisa Sili fou o le Pulega o Tagata Tafafao mai Fafo le faletua o Pativaine Petaia Tevita, o tapenaga i le toe tatala o malaga masani ua foi ai auaunaga a faletalimalo ma fale apitaga tu matafaga mo tulisi, i le tulaga masani.
E lua malaga i le aso muamua o Aokuso ua toe tatala ai tuaoi faavaomalo o Samoa ua malaga mai ai le atunuu ma nisi o tulisi tafafao mai fafo, ma e tutumu ia malaga a le Air New Zealand ma le Fiji Airways.
