O le vevesi a nisi o fanau a’oga a le kolisi o Sagato Iosefo ma le Kolisi o Leififi i le Aso Aso Faraile na tea nei, e toavalu fanau a’oga na ave ai i le falemai ona o ni manu’aga ma sa togafitia i le aso lava lea ma toe foi i o latou aiga.

O loo faaauau pea suesuega a leoleo i le mafuaaga o le vevesi, ae toalua ni fanau a’oga na maua i le tiute a leoleo i le Aso Gafua i le taulaga o la umia ni maa ma le faamoemoe e faatupu ai se solitulafono, ma ua molia ai i le umia o ni auupega matautia.

Ua faailoa e le sui komesina o leoleo le afioga Leiataua Samuelu Afamasaga ua mae’a ona faia se feiloaiga ma pule ma le vasega o faiaoga a le Kolisi o Sagato Iosefo ma faatalanoa ai le tulaga manaomia o le tausia o le filemu ma ia mataitu lelei alo ma fanau a le kolisi, o loo aafia i le faatupuina o vevesi.

O le Aso Tofi o le a feiloai ai ma le pule ma le vasega o faiaoga a le Kolisi o Leififi. E leai ni fanau aoga a ia kolisi ua molia ona o loo faia pea sailiiliga. O nisi o pisinisi laiti o loo faia i se vaega o le nofoaga faatali pasi o loo aofia foi i suesuega a leoleo e saili ai le mafuaaga tonu o le vevesi.

Ae o se tasi o tamā faipisinisi i lea nofoaga ua molia e leoleo i le faaoolima ma le umia o se auupega matautia o se laupapa, lea o loo masalomia na ia faaaoga e sasa ai nisi o tama aoga i le taimi o le vevesi.

O le masina fou o Tesema o le a tulai ai Vaa Brown i le faamasinoga.