E toatolu tagata i Sini o loo i le falemai nei mo togafitiga ina ua manavaina le kesi, carbon monoxide i se fale i Sini i le po anapo.
O le fale i Hope St, Rosehill na faavave atu iai le fuimu i le po anapo ma maua atu iai se tagata ua matapogia ma le isi toalua e tali tutusa lava foi le tulaga o loo iai.
Na aveeseina mai i latou uma ia e toatolu ma le fale, fai mai e toalua o se alii ma se tamaitai pe a ma le tai 70 tausaga ma le isi alii pe a ma le 50 tausaga.
Taua i le lipoti o se heater sa iai totonu o le fale na sau ai le kesi lea ona sa iai se faaletonu i le heater.
O le ituaiga kesi lea o le carbon monoxide e leai se lanu ma se manogi foi ae mafai ona aafia ai le soifua o le tagata ma matapogia ai foi pe afai e faatupulaia le kesi i se nofoaga punipuni.
Ua fautuaina ai foi tagata ia silasila i tulaga tau le saogalemu i heaters o loo faaaoga i fale ma ia mautinoa o loo fai ma siaki ma service mo lona faaaogaina saogalemu.
