I se galuega tele a le Matagaluega o leoleo e ala i se osofa’iga na faatino i le vaiaso nei i le afioaga o Faatoia na taofia ai e leoleo ni alii se to’a 4 ma maua ai foi le tele o fualaau faasāina ma nisi auupega malolosi.
I se feiloa’iga a le Komesina o Leoleo, Auapaau Logoitino Filipo ma le autusitala na faailoa ai o lea osofa’iga na maua ai fualaau faasāina o le aisa (meth) 3.25 kalama le mamafa, o lālā mariuana, o paipa poo utensils e faaaogā mo le aisa ma laau malosi e lua e le’i resitalaina.
O le to’afā ua molia ma taofia, e to’alua sa molia muamua pe sa iai previous convictions, o le isi to’atasi na molia muamua i le aisa ma le isi to’atasi o loo masalomia i su’esu’ega a leoleo o se alii IT a le Matagaluega o Aoga Taaloga ma Aganuu.
E tolu moliaga o loo molia faatasi uma ai i latou nei e to’afā e aofia ai le umia o le fualaau faasāina o le aisa (possession of narcotics, meth), o le umia o le fualaau faasāina o le mariuana, ma le umia o paipa poo utensils, ae e to’atasi o loo molia i le umia o laau malosi poo fana e le’i laiseneina.
O nisi o vaega na maua mai e leoleo i lea lava osofa’iga e aofia ai le seleni e $5,250.00 ma le AUD50.00, o masini komepiuta poo laptops, o nisi o masini taugata e pei o le water blaster, air compressor faapea laisene o taavale lē faatulafonoina poo fake number plates.
Faailoa e le Matagaluega o number plates ia na maua atu i le osofa’iga e iloa lelei le eseesega ma laisene sa’o o loo faatino i Vaitele, na o latou ta’ua o ia number plates o loo fausia i le fiber peitia o le laisene sa’o o taavale e gaosia lea i le apa.
E pei ona silafia o le fale lea na osofa’ia e leoleo i le aso ananafi o le fale foi lea sa maua muamua ai nisi foi fualaau faasāina peitai e le’i maua atu i latou e ona lea fale. O le osofa’iga la i le vaiaso nei lea na maua lelei atu ai lava e leoleo i latou uma o loo faia lea soligatulafono ma taofia loa.
Ta’ua foi e Auapaau o meatotino uma na maua mai ua tuu atu i se vaega o le matagaluega i Faleata seia saili e lē o meatotino ia a nisi o aiga na aafia i osofa’iga talepe fale.
