O le tina o loo molia e leoleo i le fano o le ola o se teineititi 3 tausaga o se alo e faasino i se tasi o ona alo teine, o lea ua maua lana loia e tulai mo ia, ma ua tuuina atu ai e lana loia o Mauga Precious Chang lana tali tetee i moliaga a leoleo. 

O Oketopa o le tausaga na tea nei i Faleasiu na lipotia ai i leoleo se faalavelave, na fano ai le ola o le teineititi 3 tausaga i le faamatalaga, na foi i le fale le tina ma le teineititi ina ua mae’a se faatauga, ona alu lea i le fale o le tina ae loka uma faamalamalama o le taavale ae o loo iai le teineititi.

Na faatoa manatua e le tina le teineititi ma toe siaki ai le taavale ma iloa ai ua uma le ola, i le faamatalaga a leoleo i lena taimi, ua mole le teineititi ua leai se ea okesene e mānava ai ona ua loka uma faamalama o le taavale.

I le tuanai ai o le 10 masina talu ona tupu le faalavelave, o le Aso Gafua o le vaiaso nei na faatoa faia ai le tali a le ua molia o le tetee i moliaga, ina ua faamautu le loia e finauina ona moliaga e pei ona sa faatonuina e le faamasinoga i le lua vaiaso talu ai e tatau ona iai se loia e tulai mo ia ona e matuia moliaga a leoleo.

O le tina o Pelia Sauvao Hakai 53 tausaga o le soifua, sa molia i le solitulafono o le faatamala i ona tiute faamatua i le lē ofoina o vaega e tatau ma talafeagai mo le vaaiga o le fanau ma tulai ai i le faamasinoga faaitumalo.

Peitai o le moliaga faaopoopo o le fasioti tagata paivalea ua oo ai le mataupu i le faamasinoga sili e suesueina i ai.

O le masina o Me o le tausaga fou 2023 lea ua faatulaga e valaau ai molimau a leoleo ma molimau a le tina ua molia.