E tāua le toe asiasi o talanoaga i le va o ta’ita’i o faigamalo a Samoa e lua i avanoa mo oloa gaosi mai Samoa e faaulu i le Iunaite Setete aemaise lava i oloa tau aano o manufasi.

O le tausaga e 2001 i le tuanai o le faalavelave matautia ia Setema 11 na faamuta ai le toe auina atu o aano o manufasi o le povi i Amerika Samoa ona o suiga i tulafono tau fefaataua’iga a le Malo o Amerika, peitai o feiloa’iga ma talanoaga a ta’ita’i o Amerika Samoa ma Samoa Tuto’atasi i le tausaga e 2016 na fausia ai se isi faai’uga e toe tatala, ae talu mai lena taimi e oo mai i le taimi nei o loo taofia pea aano o povi mai Samoa ona faaulufale i le teritori.

O talanoaga o loo faagasolo i le va o Samoa e lua lea ua faamoemoe e faamae’a i le faai’uga o lenei vaiaso, ua faaalia e le ta’ita’i o le Malo le afioga i le tamaitai Palemia a o lei malaga mo ia talanoaga, e tāua le toe silasila iai o sui o le Malo o Samoa i le toe faataatia atu o lea mataupu mo se finagalo o ta’ita’i o le faigamalo a Tutuila ma Manu’a.

Talu ona taofia fasipovi fasi mai Samoa e oo lava i aano o le povi ua faavela, e lē o toe mafai ona ave ni faaoso poo ni uta foi o fasipovi e faatau i Amerika Samoa.