Ua mafai nei ona faaaogā e le Aoga Tulagalua a Gataivai se falea’oga saogalemu ma mautu lelei ina ua mae’a ona fausia le latou falea’oga i se nofoaga fou e tauala atu i le fesoaosani a le Malo o Iapani. 

O lenei faamoemoe na molimauina e le toatele, e lē gata o sui o le malo o Samoa e pei o le Minisita o Aoga, Seuula Ioane o le sui foi lea o le Itumalo Palauli II ma le Minsita o Tina ma Tamaitai, Leota Laki Lamositele, ae faapea foi ma sui o le malo Iapani, lana afioga i le Amepasa Mr Senta Keisuke faapea sui o le afioaga na patipatia le atina’e tele mo fanau aoga ua tino mai. 

O lenei atina’e na faatupe i lalo o le polokalame fesoasoani a le Malo o Iapani ua faaigoaina Grant Assistance for Grass-Roots Human Security Projects (GGP). O se tasi lea o fesoasoani a lea malo ua faaopoopo atu i le tele o fesoasoani i le itu tau aoaoga ua tuu mai ai le tau’au o Iapani mo Samoa. 

E lata i le ‘afa miliona le tau atoa o lenei faamoemoe ma e aofia ai potua’oga e 8, o le potu o faia’oga, potu o le pulea’oga ma le potu tusi.