Ua toe sauni le tamaitai loia le afioga Magele Leone Mailo, e faaulu se talosaga e toe iloilo ai pe apili, le faaiuga a le faamasinoga sili na teena ai le finauga a le faletua o Iliganoa Daphne Sapolu, faasaga i le uili a lana tane faaipoipo o lē sa avea ma faamasino sili le afioga Patu Tiavaasue Falefatu Maka Sapolu.

Ua faamautu mai e le tamaitai loia, ua mae’a ona ia feiloai i le faletua o Iliganoa ma ua iai lona manao e toe lu’i le faaiuga i le faamasinoga o talosaga poo le appeal court a le faamasinoga maualuga.

O le vaiaso na tea nei na aumai ai le faaiuga a le faamasino sili le afioga Satiu Simativa Perese, ma teena ai le talosaga a le itu tagi e pei ona sa finau ai, e lei faia se uili ma sa tatau ona silafia e lē ua tagi lea tulaga a o soifua lana tane faaipoipo.

O le finauga foi na fesiligia ai le sa’o atoatoa o le saini a lē e ana le uili e pei ona sa aumai ai se tagata poto faapitoa e molimau e lagoago ai lea tuuaiga, na teena ona ua le faamalieina le faamasinoga.