Ua tālia e le faamasinoga sili le faai’uga a le afioga i le faamasino sinia le afioga Lesatele Rapi Vaai, le talosaga a leoleo e toe iloilo le faai’uga a le faamasinoga faaitumalo, ma talia ai le talosaga o le faapafala o se faasalaga e aunoa ma le faamaonia o moliaga o se alii leoleo satini o Khamtan Stanley, ma se matai sa molia faatasi i laua o Ulugia Lomalasi.

Sa ioe i laua nei e to’alua i le moliaga o le faia o se faaoolima ma le faamoemoe e faaoo ai ni manu’a i se alii talavou o le nuu o Vaiusu, lea na maliu mulimuli ane i le mae’a o lea gaioiga. O le ioega lenei na faaulu ai loa ma se talosaga a Khamtan Stanley e ala i lana loia ina ia faapafala se faasalaga e aunoa ma le faamaonia o le moliaga, ona o le finauga afai e faamaonia o le a faamuta ai ma le toe avea o ia ma Malu o le Malo ma lē toe maua ai lana galuega.

E le’i talosaga Ulugia Lomalasi ae ona sa molia faatasi o le mafuaaga lea o le faapafala o sona faasalaga ma le faamaonia foi lona moliaga. O le finauga a leoleo i le latou talosaga apili, ua lē faatāua e le faamasinoga le ogaoga ma le matuiā o le solitulafono e fesoota’i i le maliu o lē na aafia.

Sa finau foi leoleo e iai le sasi i le faai’uga a le faamasinoga faaitumalo ona o isi vaega o le tulafono e le’i faatāua i le iloiloina o le faai’uga o le talosaga na talia, na faapafala ai se faasalaga ae lē faamaonia moliaga. I le faai’uga ua aumai i le talosaga apili, ua faamaonia ai moliaga o i laua na tuua’ia ma ua faasolomuli ai i tua le faapafala o se faasalaga e aunoa ma le faamaonia o le solitulafono.

Ua faatulaga ai nei o le aso 26 o le masina fou o Setema o le a lau ai se faasalaga o Khamtan Stanley ma Ulugia Lomalasi. O le tamaitai loia o loo galue tuto’atasi o Leinafo Tuimalealiifano Strickland, na finauina le itu a leoleo, ona sa lē mafai e se loia a le Malo ona finauina ona o le vavalalata o sootaga ma le alii leoleo na molia, ona sa galue ai i le ofisa o le Loia Sili i le vaega o lea auaunaga o loo finauina moliaga solitulafono i le faamasinoga le Prosecution.