O le a’oga tulagalua a le afioaga o Vaitoomuli i le itumalo o Palauli, o le a’oga muamua lea a le malo ua amata ai le polokalame o le faaooina atu o a’oa’oga i faia’oga i le faaaogāina o auala faatekonolosi i le faamoemoe e a’oa’o ai fanau.
O le polokalame lea ua galulue faatasi ai ni auaunaga tuma’oti i fesoota’iga tekonolosi e aofia ai le E3 Samoa Trust ma le Code vengers, ma ua faaaogā ai se fata poo se platform tau fesoota’iga e momoli atu ai i faia’oga tomai e a’oa’o ai fanau i le gagana o fesoota’iga faaonaponei, ina ia mafai ona a’oa’o ai mataupu e pei o le faasaienisi, numera poo le matematika, ma le faainisinia.
O a’oa’oga nei ua faaaogā ai se ālafua poo se ta’iala tau i tomai faatekonolosi o loo a’oa’o ai fanau i atunuu e pei o Niu Sila ma Ausetalia e a’oa’o ai ma fanau a Samoa. Ua faailoa i le amatalia o lenei faamoemoe e le susuga Tony Su’a Leota o loo lotolotoi i le faaooina atu o fesoota’iga initaneti tau satelite mo ia a’oa’oga, o le fesoasoani ua tuuina atu e le malo ua mafai ona faatino ai le faamoemoe.
O le a’oga tulagalua a le Ekalesia Asofitu o le toe afio mai i Si’ufaga i Savaii na amatamea i le polokalame ma ua faaaogā nei e fai ma faata’ita’iga mo isi a’oga o le a faasolo iai le a’oa’oga.
