Ua suesueina e le komiti o faaseā a le sosaiete a Loia i Samoa se faitioga mai le Fono Faatonu a le sosaiete a loia i le atunuu faasaga i se tasi o tamaitai loia sinia, le afioga Maiava Visekota Peteru.
Na faamaonia mai e le Peresetene o le sosaiete a loia le susuga Alex Su’a lea suesuega o loo agai i le mataupu na faamaonia ai le moliaga o lea loia, o le faalemigao i le faamasinoga le Contempt of Court.
E pei ona silafia o le moliaga lea e mafua mai i le tagi na ave i le faamasinoga a le vaega faaupufai o le Faatuatua i le Atua Samoa ua Tasi, na molia ai Maiava Visekota Peteru, o le taitai o le vaega faaupufai e puipuia aiātatau a tagata, o le sui taitai, ma le failautusi o le pati, ma isi tagata e to’afa e mafua i ni tuua’iga ma ni saunoaga na tuua’ia ai le faamasinoga ma nisi o faamasino.
Na taunuu lea faamasinoga i le faamaonia o moliaga o le susuga Tuilaepa L Sailele Malielegaoi le taitai o le vaega e puipuia aiātatau a tagata, o le sui faipule le tofa Lealailepule Rimoni Aiafi, ma le tamaitai loia le afioga Maiava Visekota Peteru. Ua mae’a ona tagofia e le komiti o tulaga mamalu ma aloaia a le Palemene se faitioga na ave i le Fofoga Fetalai na faaulu e le faipule o Gaga’emauga Numera Tasi e faasino lava i tuua’iga na faatūtū i le faamasinoga.
Ma e pei ona silafia ua talia e le Palemene le fautuaga a lea komiti e pei ona faamalolo le tumau ai i le taimi nei tiute faafaipule o le Palemene o sui faipule o itumalo o Lepa ma Faleata 3.
Ua faaalia e le Peresetene o le sosaiete a loia o le suesuega o loo feagai nei ma le komiti e gafa ma faaseā faasaga i sui o le sosaiete o le a tuuina atu se latou faai’uga i se taimi o le a mae’a ai ia sailiiliga. O le tausaga e 2019 i le 2020 na faia ai foi se suesuega a le komiti o faaseā a le sosaiete i se tasi o faaseā sa tuua’ia ai foi le tamaitai loia ma faia ai le faai’uga e faamalolo le tumau lona toe galue o se loia. O Mati o le tausaga na tea nei na toe faaauau ai ona galue i le mae’a o le lua tausaga na faamuta le tumau ai lana auaunaga i ona tomai faaloia.
