Lipotia se faalavelave na tulai mai i le afiafi o le Aso Gafua o loo faamanualia ai se sui sinia o le kegi tietie pasika le Tribesmen na aveina atu ai i le falemai e pei ona lipotia e le Herald.
Ua ta’ua i lea lipoti o Otara na fanaina mai ai lea tagata ma ave atu ai i le falemai i Middlemore.
Fai mai se sooupu a leoleo o loo latou suesueina le mataupu lenei ma ta’ua ai e fai si ogaoga o manuaga o le tagata na aveina atu i le falemai.
Faailoa foi e faapea na valaau ane leoleo i le faalavelave lea poo le tea o le ono i le afiafi ma e le o fia faailoaina nisi faamatalaga o le mataupu lea ona o loo faatino suesuega.
Fai mai le Herald e ui e le o iloa tonu poo ai na faatinoina le osofaiga o loo manua ai lea sui o le Tribesmen ae o loo iai popolega e ono toe amata aliae ai foi nisi tulaga i le va o le kegi lea ma le Killer Beez lea foi sa aafia i ni vevesi i le amataga o le tausaga ma vaaia ai le mau faalavelave a o lei ausia se maliega e faamuta ai.
