O le faaiuina o le taamilosaga lakapi taitoafitu a kolisi maualuluga i Upolu ma Savaii i vae e lua muamua ma le sailiga o le siamupini, o lea ua faailoa mai e le pulega o le Lakapi Samoa, e na o le tasi le kolisi i Upolu na manumalo i le siamupini o le vaega o alii i le matutua o i latou e i lalo o le 14 tausaga le matutua, o le kolisi lea a Sagato Iosefo.
Peitai o sailiga siamupini i alii ma tamaitai i le matutua e i lalo o le 18 ma le 16 tausaga ua ave uma e Salafai lea ua siamupini ai le kolisi a Palauli i le vaega o alii, siamupini le Kolisi o Palauli i Sisifo i le vaega o tamaitai i le matutua lava lea, ae siamupini alii e i lalo o le 16 tausaga a le kolisi o Vaiola ae siamupini tamaitai i le matutua lava lea mai le kolisi o le Itu o Tane.
O le taamilosaga muamua o taaloga lakapi taitoafitu a kolisi maualuluga i le atunuu sa amata i Savaii, sosoo ai ma Upolu i le taamilosaga lona lua lea foi na faia ai ma le sailiga o le siamupini i vaega o le matutua o alii ma tamaitai sa vaevae iai.
O le faafetai a le Pulega o le Lakapi i le lagolago pea o faiaoga, o le Minisita ma le Matagaluega o aoga taaloga ma aganuu i le atiina ae o taaloga mo fanau talavou, aemaise o le itu taua o le unaia ai ma le maua ai o le ola soifua maloloina lelei.
