I le tuanai o le lua vaiaso talu ona pesia Samoa i auga o le fūlū masani, e pei o le tale matutu, tafe le isu, gagase tino, tiga sooga o ponaivi, niniva le ulu ma nisi e faasuati, ua faailoa e le sui faatonu sili o le soifua maloloina ua silia i le 2 afe tagata ua aafia i le fūlū masani ae fai si malosi tele o ona auga ua faataotolia ai nisi o tagata talavou ma le au matutua faapea le fanau iti.

O le saoasaoa tele o le pipisi o le fūlū masani na toe faataalise mai ai i le vaiaso nei se isi fautuaga a le soifua maloloina mo le atunuu e tausisia puipuiga o le tumamā lautele, ma ia nonofo i le fale pe afai ua ogaoga tele auga ua aafia ai, ma ia aua ne’i agai fanau i a’oga ma le au matutua i galuega pe afai ua taia i le fūlū. 

Ua faailoa foi e le sui Faatonu sili o le soifua maloloina le afioga Tagaloa Dr Roberts Thompsen le aafia o nisi tagata i le faama’i o le dengue fever peitai e na o le to’alima gasegase ua faamauina ma e leai se tulaga e faapopoleina ai le atunuu.

O ia gasegase o le dengue fever e lē o faailoaina mai poo fea tonu vaega o le atunuu e alala ai i latou ua aafia ai.