Leai se faasalaga o le tina na ia tago fasi lana fanau faigata.
E lua moliaga o le faaoolima na molia ai lē ua solofua ona moliaga i luma o le faamasinoga faaitumalo i Ueligitone ananafi, ma e lē o mafai ona faailoa lona igoa.
O lea tina o ia o le foster mother ma e to’alua lana fanau tama na ia vaaia, ma o le 2019 na ia fasia ai le 13 tausaga faapea ai ma le 12 tausaga ona o le maua i le a’oga ma le afi e tutu ai le tapaa.
I luma o le faamasinoga na faailoa ai e lē faigofie nei fanau tama, ma e iai foi aafiaga na soifua mai ma i laua e mafua ai ona faigata ona lē sao se upu.
O le talia ai e le faamasino o le talosaga a le loia a le tina ua sa’oloto, na mafua lea i lona vave ioeina o moliaga ina ia aua ai ne’i faaumiumi ona toso le mataupu ma aafia ai lana fanau fai.
Na manino mai ai foi, e moni e lē talia e le tulafono le sauaina o fanau, peitai o se mataupu e lē faigofie ma e le’i lava foi le lagolago a le Oranga Tamariki e fesoasoani ai i le pitolaau a le tina.
Na amana’ia foi e le faamasinoga le umi e 4 tausaga lea na tausia ai e lea tina lana fanau fai faigata.
