Ua saini le konekarate 24 miliona tala mo le fausiaina o le maketi fou i Savalalo.

Na lipotia e le nusipepa o le Samoa Observer le faatinoga o lea sainigalima i le va o le kamupani o le Zheng Construction ma le Faalapotopotoga o Fanua a le atunuu le Samoa Land Corporation i le faletalimalo o le Taumeasina Island Resort i le Aso Faraile na mavae nei.

E lua kamupani sa tauofo mo le galuega o le kamupani ua filifilia nei ma le kamupani a le Schwarz Construction Ltd.

O le kamupani o le Zheng o se kamupani o loo resitala i Samoa nei talu mai le 2012 ma o lona faatonu o se tagatanuu o le atunuu o Saina.

O lea kamupani sa ia fausia le ofisa tutotonu o Faalavelave Tutupu Faafuasei le N.E.O.C., e lē gata i lea o le ofisa o le Vaega o le Puna’oa o le Suavai i Vailima, atoa ai ma le Apia Waterfront.

Ua mae’a filifilia foi e le Kapeneta le kamupani o le Tinai Gordon and Associates mo pulega o le poloketi ma ua fuafua e faagasolo le galuega ia Oketopa poo Novema, ae o le ata fuafuaina o le galuega (design) ua tuuina atu lea i le Sucon Consulting.

O lea ata faataatia o loo faaosofia lea mai le tala ia Vaea ma Apaula ma faatulai mai ai le suia o le igoa o le Maketi mai le Maketi i Savalalo i le igoa Tuisavalalo.

Ua faatulaga le sauniga o le amata o lea galuega i le Aso Lua o le vaiaso nei.