Ua faailoa e se loia mai Melepone e ono malo le finau a le alii taalo tenisi o Novak Djokovic i le talosagaina o sona visa e ulufale mai ai i Ausetalia mo le taamilosaga tenisi i le tausaga fou e ui i le tipotieseina o ia i le amataga o le tausaga nei.

Fai mai lea loia e ono faigofie mo le alii taalo ona talosaga sa’o i le Australian Border Force e faamatala iai lona tulaga o iai ma talosaga le aveesea o nisi o aiaiga i lona toe ulufale mai i le atunuu.

Manatua foi o se tasi lenei o mataupu na faifai tetele i le tausaga nei na iu ina faaleaogaina ai le visa o Djokovic ma lē mafai ai ona taalo i le Australian Open.

Fai mai la le loia lea tau femalagaa’iga o Kon Ming Tsai o lona manatu e lelei ia Ausetalia ona faataga le ulufale mai o Djokovic mo le taamilosaga i le 2023, o ia o se tasi o tagata taalo iloga i le tenisi i le lalolagi ma o le a toatele foi nisi tagata asiasi mai fafo e fia malaga mai e maimoaina lea alii tautaua i lea foi faagatama.