E 13 masina le faasalaga i le falepuipui o se alii 41 tausaga lona matua e lei faiaiga, ina ua lau le faai’uga a le faamasinoga ma faamaonia ona moliaga e lua o le faia o se fesoota’iga i se gaioiga solitulafono na ia faia i se teineititi 13 tausaga e iai so la sootaga faaleaiga.
O le masina o Tesema o le tausaga e 2020 na tupu ai lea gaioiga solitulafono i se afioaga i Savaii e pei ona faailoa e leoleo i faamaumauga a le faamasinoga sili a le atunuu.
O le mea na tupu ua faaalia e le faamasinoga i lana faai’uga ua solia ai le va tapuia aemaise o le faatuatuaga o lē na aafia i le vaai i lē ua molia sa iai lona talitonuga e malu ai ona o ia o se tasi o tagata tino i matua i totonu o le latou aiga.
E lē o ‘asa se vaiaso ma se masina ma oo atu mataupu faapenei i le faamasinoga, ma e lē o ‘alo ai le tulafono i le faia o faai’uga e momoli atu ai le fe’au i le atunuu lautele ina ia o latou silafia ai le ogaoga o aafiaga o fanau teine laiti i solitulafono faapenei.
