O le masina o Oketopa o le a see atu ai le Faalapotopotoga Fatuga’o Samoa poo le National Kidney Foundation i lona nofoaga fou i le vaega faapitoa mo le au faanofoesea i le Maota Gasegase i Motootua.
I lipoti a le Samoa Observer na faailoa ai na faamaonia mai e le Minisita o le Soifua Maloloina afioga Valasi Tafito Selesele lea suiga fou i le masina na te’a nei.
Na ia ta’utino o le nofoaga fou ua mae’a ona toe faafou ma o le masina o Setema o le a taunuu ai inisinia mai Siamani o le a faatū ai masini mo le faamamā toto ma nisi o meafaigaluega mo le ofisa.
Faailoa foi e Valasi o loo faaaogāina masini nei i Falema’i Tetele e lua i Upolu ma Salafai. O le taimi nei e 22 masini faamamā toto mo Motootua, ma le 9 i Tuasivi. Na ia ta’ua foi e oo atu i le to’a 165 i latou o loo feagai ma togafitiga i le faamamā o le toto i le taimi nei i totonu o le atunuu.
O le siitia ai i le nofoaga fou o le a tele le fesoasoani e ala i le tele o le avanoa mo le togafitiga o gasegase uma o loo auina atu i le faalapotoptoga.
