Ua faamauina i le lipoti lata mai a le Faletupe Tutotonu o Samoa i le tulaga i tupe faamomoli mai fafo le maualuga o seleni faamomoli mai Niu Sila i le masina o Iuni, e 9 miliona 7 selau afe (9.7 miliona), sosoo ai Ausetalia e 9 miliona 2 selau afe, ma tupe faamomoli mai isi atunuu e 2 miliona tasi le selau afe.
Ua faaalia foi i le lipoti lenei o le masina foi o Iuni o le tausaga nei ua faamauina ai le oso maualuga o le aofaiga o tupe faamomoli na lafo mai i lo tatou atunuu e 20 miliona 6 selau afe o se siitaga e 40 pasene pe a faatusa i masina o Iuni o le tausaga e 2020 ma le tausaga na te’a nei 2021.
Mo tuu aofa’iga o tupe faamomoli o le tausaga faaletupe 2021 i le 2022 ua faamauina ai se aofa’iga e 125 miliona fitu selau afe tala, ma o se siitaga e tusa ma le 20 tesimale 7 pasene pe a faatusa i le tuu aofa’iga o tupe faamomoli mo le tausaga faaletupe 2020 i le 2021.
Ua faaalia e le faletupe tutotonu o le siitaga o tupe faamomoli i totonu o lea 12 masina o loo maualuga ai seleni na lafo mai Ausetalia e 72 miliona 8 selau afe tala, pito iai Niu Sila e 44 miliona, ma le Iunaite Setete o Amerika e 11 tesimale 5 miliona. I totonu lava o le 12 masina lea sa faamauina ai foi se siitaga maualuga e 133 miliona 2 selau afe tala o tupe faamomoli sa tuusa’o i aiga i Samoa.
