Ua toe taliu mai i fanua le lātō i le ea o le tamaitai Palemia ma lana aumalaga o nisi o minisita ma sui minisita faapea faauluuluga o matagaluega a le faigamalo a Samoa Tuto’atasi, ina ua mae’a talanoaga ma ta’ita’i o le faigamalo a Amerika Samoa.
O lea ua fausia se finagalo e toe faaauau i Samoa ia feiloa’iga ma talanoaga i le masina fou o Setema e faamautu ai nisi o mataupu sa soalaupule i le ulua’i feiloa’figa a le faigamalo fou a Tutuila ma Manu’a faapea foi i le tulai mai o le faigamalo a le Faatuatua i le Atua Samoa ua Tasi.
O le ‘ava faatali, o faaaloaloga ma meaalofa mo le aumalaga mai Samoa Tuto’atasi na maofa ai le ta’ita’i o le Malo i lenei itu ma lana aumalaga ma momoli ai le faafetai e le tamaitai Palemia i le afioga i le Kovana Sili ma lana taupulega, aemaise o le faagaeetia o le tamaitai Palemia le afioga Fiame Naomi Mataafa i le autu na faatumutumu iai tapenaga a Amerika Samoa i talanoaga, o le Atoa o Samoa, ma ua fusia faatasi ai faigamalo e lua o le aiga e tasi, auā e pei ona silafia e ui ina eseese faatinoga o faigamalo, e lē mala ese Sasa’e e lē mala ese foi Sisifo, e tasi lo la faa’autama.
O ni vaega o saunoaga tau māvae mai le tamaitai Palemia afioga Fiame Naomi Mataafa ma le Kovana Sili o Amerika Samoa le afioga Lemanu Palepoi Sialega Mauga. O le tu ma le aga faasamoa o le faaaloalo i le faaaloalo ma o le tulaga lea sa alo iai le tamaitai Palemia ma lana aumalaga o faaaloaloga mo le Kovana Sili ma lana faigamalo.
E ese mai i feiloa’iga faalemalo, sa feiloa’i foi le Palemia ma lana aumalaga i le mafutaga o sui lagolago o le latou pati faaupufai i Amerika Samoa na faatino ai foi fesaga’iga ma faaaloaloga a itu e lua, faatasi ai ma se sailigatupe sa faafoe e sui lagolago o le Faautuatua i le Atua Samoa ua tasi i Amerika Samoa. A o iai le ta’ita’i o le Malo i Tutuila ma Manu’a sa latou asia foi le kamupani tuuapai’a o loo to’atele alo ma tamafanau a Samoa Tuto’atasi o loo galulue ai. Ua na o le aumalaga a le Malo sa totogi e le Malo Samoa le auai atu i le fonotaga ma ta’ita’i o Amerika Samoa.
