O lea ua amata nei ona faatino le galuega o le fausia o le ofisa tutotonu o le Fono Faavae a le itumalo palota o Faasaleleaga Numera 5, ina ua mae’a ona fofo nisi o to’a sa faatuai ai lea galuega, aemaise o le toso ai ma le fuafuaga o le atinae o le itumalo e faaaogā iai le miliona tala muamua o le poloketi a le Malo o loo faagasolo.

Na maua se feiloaiga ma le faipule o Faasaleleaga Numera 5 le afioga Peseta Vaifou Tevagaena ma ia faailoa ai vala sa mafua ai ona tuai maua e lona itumalo tupe o le poloketi miliona tala.

O le vaega muamua na aafia ai tapenaga o le numera o sui o le komiti lea sa fetosoa’i le manao o se tasi o afioaga o le itumalo e toasefulu o latou sui i le komiti, ae tailua sui o isi nuu o le itumalo.

Sosoo ai ma le faatino atu o le galuega o le ofisa tutotonu ae taofi e se tasi o aiga ma oo ai i le faamasinoga lea ua mae’a ma ua laolao ai le avanoa e faatino ai loa le fausia o le ofisa tutotonu.

O le amataga o le vaiaso na feiloai ai le komiti o le poloketi tasi le miliona a le Malo ma sui o le komiti a Faasaleleaga numera 5.

Le afioga i le sui faipule o le itumalo faapalota o Faasaleleaga Numera 5 afioga Peseta Vaifou Tevagaena.