I totonu o le 48 itula mai le aso 17 agai atu i le aso 19 o Iulai ua lipotia mai e le Matagaluega o le Soifua Mālōlōina, e to’a 60 i latou ua faamaonia ai le pesia i le siama o le Koviti-19.
I lea fuainumera, o loo aofia ai le to’a 59 o i latou mai i le mamalu lautele o le atunuu, ma le to’atasi na faimalaga atu i totonu o le atunuu poo le border. Ua siitia ai le aofa’iga o i latou ua aafia i le siama i Samoa 15,243.
O loo tumau pea le numera o i latou ua fano le soifua ona o le koviti i le to’a 29 ma le to’alua o loo taofia i nofoaga faapitoa i le falema’i i Motootua.
O loo tumau pea fautuaga a le Matagaluega mo le atunuu atoa ina ia aga’i i se falema’i lata ane mo le faia o lou tuipuipui o le Koviti, auā o le puipuiga sili lea e tetee atu ai i le ma’ema’eā o lenei vairusi.
Na ave ai le faamalo i le onosai ma le nofo tatalo o le atunuu, o lea ua amata faaitiitia le numera o tagata e aafia i aso ta’itasi.
