O le poloketi $1miliona a le malo mo itumalo e 51 lea e faamatuu muamua le ta’i $200,000 ua faamaonia mai nei ua oo atu i le 48 itumalo ua mae’a ona sainia lea feagaiga mo le faaaogāina o lea seleni.
I lipoti a le nusipepa a le Savali na faailoa ai le feiloa’iga ma le Ofisa Sili o pulega o le Matagaluega o Tina ma Tamaitai Atina’e o Nuu ma Agafesootai ia Dr Mema Motusaga, na ia faamaonia ai lea fuainumera, o lona uiga e toe 3 lava itumalo o loo tālia ma tau faamae’a feutana’iga o a latou komiti mo le poloketi.
O le masina o Aperila i le tausaga nei na amata ai sainigalima mo le faamatuu atu o le ta’i $200,000 tala mo ofisa ma e ono itumalo ua maea’ ona fausia ma ua amata faaaogā a latou ofisa e aofia ai Faleata No.2, Sagaga No.4, Gaga’emauga No.2, Aleipata Itupa i Lalo, Falealili No.2 ma Aana Alofi No.1.
O le naunauta’iga o lenei poloketi ina ia mafai ona faalauiloa nisi o atina’e a itumalo eseese ma vaega e mafai ona galulue faatasi ai afioaga mo so latou lumana’i manuia.
