Ua maea ona faalauiloa le uluai seleselega a le itumalo o Palauli Nu.1 e aofia ai afioaga o Taga, Salailua, Satuiatua, Foailuga i le motu tele i Salafai ma o se vaega o le latou patipatia ai o le 60 tausaga o le tuto’atasi o Samoa. 

O lea faamoemoe sa faatautaia i Foailalo ma e to’atele sui o le Kapeneta na auai ai i lea faamoemoe ae faapea faauluuluga o matagaluega a le malo ae lē gata i lea o le to’atele o sui o le itumalo i faifaato’aga na auai e molimauina le latou uluai seleselega. 

O le Minisita o Faato’aga ma Faigafaiva Laauli Leuatea Polataivao Fosi Schmidt na fai ma sui o le malo e faafetaia le itumalo o Palauli Nu.1 ona o le latou faalauiloa. Na ave foi iai le faamalo i tulaga o a latou tapenaga ua taunuu manuia ai lea faamoemoe. 

Na ia fautuaina foi fai faato’aga o le itumalo ina ia faaauau pea le galulue punoua’i ia latou atina’e tau faato’aga ma atina’e o le gataifale auā o le alaga’oa tele lea mo aiga nuu faapea ekalesia. 

O se tasi lea o itumalo ua faaaopoopo atu i le tele o itumalo ua mae’a a latou uluai seleselega ma a latou faalauiloa e ala i fua o faaeleeleaga ma atina’e eseese mo le lumana’i manuia o soo se itumalo.