Ua lima nei fautasi o le a tausinio i faaagatama i le tai i le polokalame e taualuga ai le faamanatuina o le 60 tausaga o le Tutoatasi lea ua faatulaga mo le masina fou o Me.
E pei ona silafia e fā fautasi na faaulu i totonu o le taimi sa tuu avanoa ai le soā komiti o faigamea i le tai i faalapotopotoga o nuu ma afioaga e lesitala atu ai ni Sa, peitai ua faailoa lautele e le taitaifono o lea soā komiti le komesina o leoleo o le Telefoni o le Vainuu na lesitala atu ua mae’a le taimi, peitai ua talia lea fautasi e auai ma ua iai ma le ioega a kapeteni o isi Sa e fā.
O faailoga tupe ua faatulaga mai mo fautasi o le a faaalu ai le $180 afe, lea o le a maua e le vaa e mua le 60 afe tala, tulaga lua e 50 afe, tutolu e 40 afe, tulaga fā 20 afe le faailoga tupe ma le tulaga lima e 10 afe tala.
O fautasi la ua amata koleni nei ma tapena mo lea polokalame o faafiafiaga faaiu o le onosefulu tausaga o le tatou fu’a, Telefoni o le vainuu mai Manono tai, Tolotolo o Tama Uli, o le Sa o le DonBosco le aoga o matata eseese a le Ekalesia Katoliko, o le fautasi a Tama tuai o le Malisi, ma le Sa mai le afioaga o Toamua le Littlerina.
