E 6 aso lea ua iloilo ai le maliu o Rory Nairn i luma o le faamasinoga faaitumalo i Dunedin, ma o ia lea na maliu ia Novema o le tausaga talu ai i totonu o le lua vaiaso i le faato’ā uma ona faia o lona tui muamua.
I molimau e faapea e lē o se masani le lapatai o tagata e aga’i atu mo tui i le faletalavai sa faia ai le tui o lē ua maliu, e ui o lea na sau lapataiga mai le soifua mālōlōina i le faai’uga o Aokuso na alia’e ai foi se tasi o tina na maliu ona o aafiaga mulimuli mai.
Mai le pulega o le faletalavai e faapea na misi ia te ia le lapataiga na sau e lapatai tagata i le myocarditis poo le aafiaga o le fatu, ma o le maliu o Nairn na amata sui mai ai loa le faiga o tui a le faletalavai.
O lē ua maliu e faapea na amata faalogoina le tiga o lona fatafata, peitai e na te lē o silafia āuga o le myocarditis ma e le’i manuia togafitiga na faia iai ina ua pa’ū i le fale ma uma ai lona soifua.
E faaauau i le vaiaso fou tolaulauga o lenei mataupu.
