O lea ua leai le tele o tulafono o le Koviti, peitai e iai le tasi o loo totoe ae e lei pisa tele mai ai le malo.

O le po o le Aso Gafua lea na faamuta ai le faamalosia o ufi fofoga faapea ai ma le traffic light system a Niu Sila, ma o lea ua faitau vaiaso le toe iai ni poloaiga faamalosia ai le faia o tuipuipui.

Peitai, afai o lea e te faimalaga mai i Niu Sila, e le o suia ai le tatau ona faatumu o lau traveller declaration poo le tautinoga o loo faia e pasese uma e taunuu mai i totonu o le atunuu.

Ua sau ai manatu o nisi i tala a le Stuff o lea e lei pisa tele le malo i le faatumau o le traveller declaration.

O le form lenei afai e te malaga mai i Samoa i Niu Sila nei mo se faataitaiga, o loo tapa i le malaevaalele i Faleolo toe taunuu mai iinei toe faailoa, ma afai ae leai, o lona uiga e le mafai ona e oso i le vaalele.

I le fesiligia ai o le faatumau pea o lea tautinoga, o loo finau ai le malo e mo contact tracing, poo le faafaigofie ona saili tagata pe a moomia mulimuli ane.

I nisi o lipoti e le o fiafia ai le toatele ua tautino, ona e tutusa fesili o le traveller declaration ma le pepa faatumu a le vaega o tiute lea foi e faatumu i luga o le vaalele.