O le vaiaso nei ua fono ai sui o le komiti o le iloiloga o le Faavae o le Ekalesia Faapotopotoga Kerisiano Samoa i le maota fono i Malua, i le faamoemoe e soalaupule ni teuteuga i le faavae o le ekalesia, a o lumanai lana fono tele e amata usuia i le vaiaso fou.
E iai le talitonuga o ni teuteuga o le a finagalo iai le komiti o le a folasia mo se finagalo o le fono tele lea ua tauaofia i lenei masina o Setema ae ua le o le masina o Me e pei ona masani ai.
Ua tolo mai le fono lenei i le masina lona iva o lenei tausaga, ona sa tapunia tuaoi faavaomalo lea na faatoa tatala i le masina o Aokuso na tea nei.
Ua tumutumu ai lo tatou atunuu i usugafono mai Ausetalia, Niu Sila, ma Amerika faapea usugafono mai Pulega ma Matagaluega i Upolu ma Savaii.
O le faatoa toe tauaofia lea o le fono tele i tulaga masani i le tuanai o le 3 tausaga o tapunia tuaoi i malaga masani ona o le faamai.
