E fitu itumalo o le a saunia pese ma siva faaleaganuu pe a faagasolo le polokalame o faafiafiaga o le 60 tausaga o le Tuto’atasi i le masina fou o Setema.
E le’i faailoaina i se tulaga lautele poo ai ia itumalo, ae ua faailoa e sui o le komiti o tapenaga i auala o fesoota’iga mai le ofisa sooupu o le Malo, o le vaiaso fou e asia ai e sui o le komiti itumalo ua lautogia mo le siakiina o a latou tapenaga.
O se tasi o itumalo ua mautinoa lo latou valaaulia e saunia ai le pese o le itumalo lea o Sagaga 4, ma na faailoa e le Sui Palemia lea valaaulia i le tatalaina o le ofisa o le Fono Faavae a lea itumalo i le masina na te’a nei. Ua faailoa foi e sui o le komiti o tapenaga, o le Aso Tofi le aso 9 o Setema e faia ai faafiafiaga o pese ma siva faaleaganuu i lumāmaota o le Malo i le eleele fou.
O nisi o polokalame ua faailoa e le komiti o le tauvaga o siva e pei o mauluulu, o stalls poo nofoaga e 40 o le a faatutū ai falei’e e faatau atu ai galuega taulima, o laei, ma isi oloa faapea ma fale’aiga ma e vaiaso atoa o le a faagaioia ai ia nofoaga i le nuu o loo tuafale iai le maota Samoa o le Pulega o Tagata Tafafao i le eleele fou.
O le vaiaso nei o le a fono ai sui o le komiti ma i latou ua lesitala atu mo le faagaioia o ia nofoaga i le vaiaso o le Teuila o le a faagasolo ai faafiafiaga o le onosefulu tausaga o le Tuto’atasi. E lē gata ina fai ia polokalame i Upolu, ae o le a faapena foi ona faatino i le motu tele i Salafai.
O le Aso Sa le aso 4 o Setema ua faatulaga e amata ai polokalame uma i pesepesega faalelotu ma ua lautogia ai le Kolisi Faafaifeau a le Ekalesia Matotisi Samoa i Piula, Kolisi Faafaifeau a le EFKS i Malua, Kolisi Faafaifeau a le Katoliko i Moamoa, ma le Kolisi Faafaifeau a le Ekalesia Nasareta i Ululoloa. O le maota o Tupulaga a le Ekalesia Faapotopotoga Kerisiano i Mulinuu o le a faia ai lea polokalame.
